Հարսնաքարի գործ. Դատավորը միջնորդությունների վերաբերյալ որոշում չկայացրեց

«Հարսնաքար» ռեստորանային համալիրում դաժան ծեծի ենթարկվելու հետևանքով մահացած Վահե Ավետյանի գործով հերթական դատական նիստի ժամանակ Ավան և Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանը հետաձգեց տուժողի իրավահաջորդի ներկայացուցիչների կողմից ներկայացրած 25 միջնորդությունների քննարկումը: Դատավորը հայտարարեց, որ այդ միջնորդություններին կանդրադառնան այն ժամանակ, երբ որոշում կայացնելու համար էական հանգամանքներ պարզվեն:
Դատախազ Արթուր Դավթյանը համաձայնեց միջնորդություններից միայն մեկի հետ, 7-ի քննարկումը առաջարկեց հետաձգել, իսկ 17 միջնորդությունների նկատմամբ ներկայացրեց առարկություն: Ամբաստանյալների պաշտպանները հիմնականում համաձայնվեցին դատախազի առաջարկությունների հետ, իսկ տուժող կողմը շարունակեց պնդել իր միջնորդությունը:
Հիշեցնենք, որ դատական այս գործընթացի համար հիմք է դարձել Երևանի կայազորի հոսպիտալի ԼՕՌ բաժանմունքի պետ, մայոր Վահե Ավետյանին ու նրա ընկերներին ծեծելը եւ Ավետյանին մահվան հասցնելը: Դեպքի նախաքննության արդյունքում մեղադրյալներ են ճանաչվել Գարիկ Մարգարյանը, Դավիթ Ադամյանը, Արթուր Բաբլոյանը, Արման Բաղդասարյանը, Արման Խաչատրյանն ու Նորայր Հայրապետյանը։
Տուժողի իրավահաջորդի շահերը ներկայացնող փաստաբանները համոզված են, որ նախաքննությունը իրականացվել է կոպիտ սխալներով ու բացթողումներով: Դրա համար է, որ նրանք դեռ օգոստոսի 10-ին և 20-ին նախաքննության մարմնին ներկայացրել էին գործի վերաբերյալ միջնորդություններ՝ վեր հանելով նախաքննության ընթացքում տեղ գտած բացթողումներն ու սխալները: Որոնք սակայն մերժվել էին ինչպես նախաքննության մարմնի, այնպես էլ գործով դատախազի կողմից:
Այսօր էլ՝ դատախազը եւ պաշտըպանական կողմը արտահայտեցին իրենց կարծիքը միջնորդությունների վերաբերյալ, որը հիմնականում բացասական էր:
Տուժող կողմի փաստաբանները պահանջել էին, որ «Հարսնաքար» ռեստորանային համալիրի տեսաձայնագրման համակարգին միացված համակարգչի պրոցեսորը ճանաչվի իրեղեն ապացույց, կցվի գործին, կատարվի համակարգչի պրոցեսորի կրկնակի հետազոտություն եւ նշանակի դատահամակարգչա-տեխնիկական փորձաքննություն:
«Կատարել «Հարսնաքար» ռեստորանային համալիրի տարածքի ամբողջական զննութուն՝ պարզելու, թե որտեղ են տեղակայված եղել տեսախցիկները կամ հանցագործության դեպքից հետո տեսախցիկների ապամոնտաժման դեպքում, որ մասում են դրանք տեղակայված եղել, առգրավել ռեստորանային համալիրում եղած բոլոր պրոցեսորները և արդեն իսկ առգրավված պրոցեսորի հետ մեկտեղ ներկայացնել մասնագետներին՝ պարզելու, թե արդյոք այդ կրիչների վրա պարունակվում են դեպքի օրվա տեսաձայնագրության ֆայլեր, իսկ դրանց բացակայության դեպքում պարզել՝ արդյոք դրանք չէին կարող ջնջված լինել էլեկտրոնային կրիչներից»,- միջնորդել էր փաստաբան Տիգրան Եգորյանը նախորդ դատական նիստի ժամանակ:
Դատախազը նշեց, որ համակարգիչը զննելու ժամանակ քննիչի հետ եղել է մասնագետ, ով չի առանձնացրել քննությանը վերաբերող որեւէ տվյալ, որի համար էլ պրոցեսորը արդյունքում իրեղեն ապացույց չի ճանաչվել:
«Հանցագործության չպարզված մասնակիցների բացահայտմանն ուղղված միջոցառումները շարունակելու նպատակով այս քրեական գործից առանձին մաս է անջատվել: Ու այդ անջատված մասում առգրավված պրոցեսորը ենթարկվել է փորձաքննության, որոնց պատասխանները այդ գործով դատական քննության ժամանակ մենք կստանանք: Դեպքի վայրի զննություն կատարելու անհրաժեշտություն եւս չկա եւ տեսախցիկների տեղադրման վայրը որեւէ էական նշանակություն չեն կարող ունենալ»,- համոզված է դատախազը:
Դատախազն առարկեց բոլոր այն միջնորդությունները, որոնք, իր կարծիքով, վերաբերում էին հանցագործության նոր մասնակիցների հայտնաբերմանը եւ կապ չունեին ամբաստանյալների հետ:
Օրենքով սահմանված կարգով Ռուբեն Հայրապետյանին և Նորայր Հայրապետյանին պատկանող հեռախոսահամարներին դեպքի օրը, դրան նախորդող և հաջորդող օրերին կատարված հեռախոսազանգերի (մուտքային և ելքային) վերծանումները պահանջելը եւ տեղանքում գտնվող բոլոր ալեհավաքների վերաբերյալ տեխնիկական տվյալների պարզելը դատախազի համար կապ չունեն այս դատական գործի հետ: Նրա համար կարեւոր չէ, թե ամբաստանյալները որտեղ են աշխատել ՝ Ռուբեն Հայրապետյանի թիկնապահնե՞րն են եղել, թե՞ ռեստորանի աշխտակիցները:
«Ես համաձայն եմ միայն մեկ միջնորդության հետ, որ պետք է պարզել արդյոք «Հարսնաքար» ռեստորանային համալիրի տեսաձայնագրման համակարգին միացված համակարգչի պրոցեսորի առգրավման և զննության վերաբերյալ կազմված արձանագրություններում նշված ընթերականերն իրականում գոյություն ունե՞ն, թե՞ ոչ: Ես համոզված եմ, որ նրանք գոյություն ունեն եւ հաջորդ դատական նիստի ընթացքում կաշխատեմ ներկայացնել նրանց ամբողջական տվյալները»,- հայտարարեց դատախազը:
Ամբաստանյալների պաշտպանները դատարանից 30 րոպե ժամանակ խնդրեցին, որ կարողանան միասնական դիրքորոշում արտահայտել միջնորդությունների վերաբերյալ: Ընդմիջումից հետո նրանք համաձայնվեցին դատախազի դիրքորոշումների ՝ նշելով միայն, որ համամիտ չեն, որ իրենց պաշտպանյալները գործել են միասնաբար դիտավորությամբ, փոխլրացված գործողություններով, ինչպես, որ դատախազն էր հայտնել:
Նրանցից երկուսը միայն հայտնեցին, որ տուժողների և մեղադրյալների հագուստի վրա առկա միկրո մասնիկների առկայությունը պարզելու համար համապատասխան կենսաբանական (մասնիկաբանական) փորձաքննություն անցկացնելու միջնորդությունը կարեւոր է եւ հնարավորություն կտա ավելի որոշակիացնել, թե կոնկրետ ով ում է հպվել վիճաբանության և ծեծի ընթացքում:
Դատավոր Դավիթ Հարությունյանը հետաձգեց միջնորդությունների քննարկումը՝ հայտարարելով, որ որոշում կայացնելու համար էական հանգամանքներ պետք է պարզվեն:
Հաջորդ դատական նիստը տեղի կունենա հոկտեմբերի 22-ին՝ ժամը 13:00-ին:

21:39:16 - 17/10/2012

բաժնի քննիչ Ռուբեն Վարդանյանի կողմից բռնություն է գործադրվել Վահե Ավետյանի իրավահաջորդի ներկայացուցիչ, փաստաբան Տիգրան Եգորյանի նկատմամբ:

Երեկ Քննչական գլխավոր վարչության հատուկ կարևոր գործերի քննության վարչության մարդու կյանքի և առողջության դեմ ուղղված հանցագործությունների բաժնի քննիչ Ռուբեն Վարդանյանի կողմից բռնություն է գործադրվել Վահե Ավետյանի իրավահաջորդի ներկայացուցիչ, փաստաբան Տիգրան Եգորյանի նկատմամբ:
Բռնի գործողությունները տեղի են ունեցել Քննչական գլխավոր վարչության շենքում, քննիչ Ռուբեն Վարդանյանի աշխատասենյակում, որը շարունակվել է նաև միջանցքում`այլ քննիչների ներկայությամբ: Միջադեպին ներկա է եղել նաև Տիգրան Եգորյանի գործընկեր, փաստաբան Լուսինե Հակոբյանը, ով և ներկայացրեց տեղի ունեցածի մանրամասները:
Երեկ փաստաբան Լուսինե Հոկոբյանը վկայի հետ հրավիրվել է ՀԿԳ քննչական վարչության քննիչ Ռուբեն Վարդանյանի մոտ` քրեական գործի շրջանակներում մասնակցելու իր վստահորդի հարցաքննությանը: Վերջինիս շահերը ներկայացնում է նաև փաստաբան Տիգրան Եգորյանը, ով քննչական վարչություն է եկել քիչ ուշացումով և քննիչ Վարդանյանը հրաժարվել է անցաթուղթ իջեցնել փաստաբանի համար` վկայակոչելով Քրդատօր 86 հոդվածը, որի համաձայն, ըստ քննիչի, վկան կարող է ունենալ միայն մեկ փաստաբան:
«Սա ակնհայտորեն կամայական մեկնաբանություն է, քանի որ օրենսդիրը եզակի թվով է նշում պաշտպան, փաստաբան, ներկայացուցիչ բառերը և դա ոչ մի կերպ չի կարող մեկնաբանվել որպես մի ներկայացուցչի իրավունք»,- ասում է Լուսինե Հակոբյանը:
Քննիչ Ռուբեն Վարդանյանը չի ընդունել փաստաբանի մեկնաբանությունը և անցաթուղթ չի տրամադրել, սակայն Տիգրան Եգորյանը քննչական վարչության գրասենյակի միջոցով բարձրացել է Ռուբեն Վարդանյանի աշխատասենյակ` իր մասնագիտական պարտականությունները կատարելու` վստահորդի շահերը ներկայացնելու:
«Երբ Տիգրանը ներս մտավ, քննիչ Վարդանյանը կոպտորեն դուրս հրավիրեց նրան աշխատասենյակից: Տիգրանը փորձեց երկխոսություն ծավալել քննիչի ետ, սակայն վերջինս ֆիզիկական ուժ կիրառեց փաստաբանի նկատմամբ և հրելով դուրս արեց նրան աշխատասենյակից, իսկ արդեն միջանցքում մեզ մոտեցան ևս երկու քննիչներ` Ռաֆիկ Ավագյանն ու Գրիգոր Մնոյանը», - պատմում է Լուսինե Հակոբյանը:
Ռուբեն Վարդանյանի ագրեսիվ գործողությունները շարունակվել են նաև միջանցքում: Նա պահանջել է, որպեսզի փաստաբանը հեռանա և հրելով դուրս է արել նրան: Ի վերջո Տիգրան Եգորյանը լքել է ոստիկանական տարածքը:
Թե ինչու է քննիչ Ռուբեն վարդանյանը նման վարքագիծ դրսևորել, սա ևս բացատրություն ունի: «Հարցն այն է, որ քննիչ Ռուբեն Վարդանյանը «Հարսնաքարի» գործով քննչական խմբի անդամ է և այդ քննչական խմբի ապօրինի, կամայական գործողությունների մասին մենք արել ենք բազմաթիվ հայտարարություններ: Նման վարքագիծն ակնհայտորեն խոսում է մեր նկատմամբ նրանց անբարյացկամ տրամադրվածության և վրեժխնդիր լինելու մասին», պարզաբանում է Լուսինե Հակոբյանը:
«Հարսնաքարի» գործով քննչական խմբի անդամներ են նաև վերը նշված երկու քննիչները՝ Գրիգոր Մնոյանն ու Ռաֆիկ Ավագյանը, որոնք, ըստ փաստաբանների, նույնպես ագրեսիվ պահվածք են դրսևորել իրենց արտահայտություններով ու գործողություններով:
Միջադեպի կապակցությամբ փաստաբանները բողոք են պատրաստել, որն արդեն իսկ ներկայացվել է գլխավոր դատախազություն, մարդու իրավունքների պաշտպանին, Փաստաբանների պալատի նախագահին, ոստիկանապետին, նախագահի վերահսկողական ծառայություն, գլխավոր քննչական վարչության պետ Գագիկ Համբարձումյանին:
Բացի այն, որ բողոքում ներկայացվել են միջադեպի մանրամասները, փաստաբանները պահանջել են նաև, որպեսզի փաստի առթիվ փաստաբանի մասնագիտական գործունեությունը խոչընդոտելու, ֆիզիկական ուժ գործադրելու և պաշտոնական լիազորությունները գերազանցելու կապակցությամբ քրեական գործ հարուցել քննիչ Ռուբեն Վարդանյանի նկատմամբ`Քր.օր 309 (լիազորությունների գերազանցում)և 332 պրիմ 3 (փաստաբանի գործունեությանը խոչնդոտելը հոդվածներով:
Հավելենք նաև, որ քննիչ Ռուբեն Վարդանյանը իր բռնի գործողություններով և գործ սարքելով հայտնի է Արագածոտնի մարզի Կաթնաղբյուր գյուղի բնակիչ Սաշա Դավթյանի գործով: նա ոչ միայն ցուցումներ էր տվել բռնություններ գործադրել Սաշա Դավթյանի և նրա աղջիկների նկատմաբ, այլև մասնակցել էր դրանց և կեղծել ամբողջ քրեական գործը:
Հիշեցնենք, սա այն աղմկահարույց քրեական գործն է, որով դատավոր Արագածոտնի մարզի ընդհանուր իրավասության դատարանի դատավոր Ռուզաննա Բարսեղյանը արդարացման դատավճիռ կայացրեց:
Փաստորեն, քննիչ Ռուբեն Վարդանյանի այս ընդունակությունները գնահատվել է ոստիկանության ղեկավարության կողմից և նրան այս անգամ արդեն ընդգրկել են մեկ այլ աղմկահարույց «Հարսնաքարի» գործում որպես քննչական խմբի անդամ:
«Մեր նպատակն է՝ ոստիկանությունը դարձնել ընկալելի, մաքրել այն խարանը, որ դրված է մեր վրա, անարադարության, ոչ ճշմարիտ լուծումներ տալու,երկակի ստանդարտներ կիրառելու»,- պարբերաբար հայտարարարում է ոստիկանապետ Վլադիմիր Գասպարյանը, սակայն իրողությունները ցույց են տալիս, որ խարանի մասով ոչինչ չի փոխվում:

ՎԱՀԵ ԱՎԵՏՅԱՆԻ ԳՈՐԾՈՎ ՓԱՍՏԱԲԱՆՆԵՐԻ ՄԻՋՆՈՐԴՈՒԹՅՈՒՆԸ ԴԱՏԱՐԱՆԻՆ

Վահե Ավետյանի գործով տուժողի իրավահաջորդի ներկայացուցիչները հերթական դատական նիստի ժամանակ Երևանի Ավան և Նոր- Նորք վարչական շրջանների ընդհանուր իրավասության դատարանում գործը քննող դատավոր Դավիթ Հարությունյանին ներկայացրին միջնորդություններ և խնդրեցին արդյուքնում ձեռք բերված ապացույցները կցել քրեական գործին, ինչը, ըստ նրանց, կնպաստի գործով հանցագործության ամբողջական պատկերի բացահայտմանը: Առաջիկա դատական նիստին` հոկտեմբերի 17-ին, դատարանը կլսի դատավարության կողմերի կարծիքները միջնորդությունների վերաբերյալ: Տուժողի իրավահաջորդի ներկայացուցիչների միջնորդությունը ներկայացնում ենք ստորև.
.
«10.10.2012թ.
.
ՄԻՋՆՈՐԴՈՒԹՅՈՒՆ
Թիվ 17115012 քրեական գործի վերաբերյալ
.
Հարգելի դատարան,
.
Սույն թվականի օգոստոսի 8-ին ՀՀ ոստիկանության ՔԳՎ ՀԿԳ քննության վարչությունը, որի վարույթում է գտնվում թիվ 17115012 քրեական գործը, հայտարարել էր գործի մի մասով նախաքննության ավարտ: Օգոստոսի 10-ին և 20-ին մենք նախաքննության մարմնին էինք ներկայացրել գործի վերաբերյալ ըստ էության միջնորդություններ, որոնցով վեր էինք հանել նախաքննության ընթացքում տեղ գտած մի շարք լուրջ բացթողումներ և սխալներ` ակնկալելով, որ նախաքննության մարմինը կդրսևորի գործի լրիվ, բազմակողմանի և օբյեկտիվ քննություն իրականացնելու կամք և կբավարարի դրանք: Նման մոտեցում նախաքննության մարմինը չի դրսևորել և ամբողջությամբ մերժել է մեր միջնորդությունները: Գործի նկատմամբ վերահսկողություն իրականացնող դատախազը` ՀՀ գլխավոր դատախազության Մարդու դեմ ուղղված հանցագործությունների վարչության պետի տեղակալ Ա. Դավթյանը նույնպես իր որոշմամբ մերժել է նախաքննության մարմնի որոշման դեմ բերված մեր բողոքը: Հաշվի առնելով այս հանգամանքը և ղեկավարվելով ՀՀ քրեական դատավարության օրենսգրքի 331-րդ հոդվածով մեզ ընձեռված հնարավորությունից` սույնով դատարանին ենք ներկայացնում ենք մեր միջնորդությունները նոր ապացույցներ պահանջելու և գործին կցելու մասին:
.
1. Այսպես` գործի նյութերի ուսումնասիրությունից մեզ համար պարզ էր դարձել, որ քննիչի կողմից առգրավվել էր “Հարսնաքար” ռեստորանային համալիրի տեսաձայնագրման համակարգին միացված համակարգչի պրոցեսորը: Ընդ որում, հատկանշական է, որ չէր կատարվել լիարժեք զննություն ռեստորանային համալիրի տարածքում՝ պարզելու, թե որտեղ են տեղակայված եղել տեսախցիկներ: Հարկ է նկատել, որ տեսախցիների առկայությունը ճշտելու վերաբերյալ հարցերին վկաներ Խաչատուր Սարգսյանը (II հատոր գ. թ. 169) և Կարլեն Ստեփանյանը (II հատոր գ. թ. 177-178) հայտնել են, որ ռեստորանային համալիրի տարածքում եղել են տեսախցիկներ: Միաժամանակ, որևէ գործողություն չի կատարվել` պարզելու, թե արդյոք քննիչի կողմից առգրավված պրոցեսորը եղել է այն միակ հնարավոր կրիչը, որի վրա կարող էր պահպանվել հանցագործության տեսաձայնագրությունը:
.
“Հարսնաքար” ռեստորանային համալիրի` քննիչի կողմից առգրավված և զննած տեսանկարահանման սարքերին միացված համակարգչի “ROOT” գրառումով պրոցեսորի զննության արդյունքում քննիչը պարզել էր, որ “DVRNET” ծրագրի օգնությամբ կատարված վերջին տեսագրությունը կատարվել է 17.11.2011 թվականին: Ընդ որում, այս հանգամանքը պարզելու նպատակով քննիչի կողմից կատարվել էր ընդամենը “DVRNET” ծրագրի ավտոմատ գործարկում: Այլ խոսքով, տեղի ունեցած իրադարձությունների տեսաձայնագրության պարունակության պես կարևորագույն տեղեկատվությունը պարզելու հարցում քննիչը սահմանափակվել էր ընդամենը համակարգչի մկնիկի մեկ գործողությամբ: Այնինչ, նշված համակարգիչը և դրանում պարունակվող կրիչները պետք էր անմիջապես ներկայացնել համապատասխան մասնագետների/փորձագետների ուսումնասիրությանը և նրանց օգնությամբ փորձել պարզել, թե արդյոք նշված կրիչներում պարունակվող տեղեկատվությունը չէր մաքրվել կամ հեռացվել և արդյոք հնարավոր էր այդ տեղեկատվությունը վերականգնել: Ի դեպ, “ROOT” պայմանանունն է հիմնականում կրում համակարգչային ցանցի համակարգիչներից գլխավորը, ինչը նշանակում է, որ ամենայն հավանականությամբ գոյություն է ունեցել համակարգիչների ցանց և այդ ցանցում առգրավվածը և զննվածը եղել է գլխավորը, իսկ այդ պարագայում հնարավոր է, որ տեղեկատվական բազան լիներ ցանցի այլ համակարգչում: Այս ամենը պարզելու համար ևս չեն կատարվել համապատասխան գործողություններ: Բացի այդ, խիստ կասկածելի է նաև այն, որ այդ “ROOT” գրառումով պրոցեսորի զննության գործողությունը /I հատոր գ.թ. 44-47/ կատարվել է երկու ընթերակաների մասնակցությամբ, որոնց, ըստ էության, հնարավոր չէ գտնել, քանի որ բացակայում են նրանց հասցեները, և հայտնի է միայն, որ նրանք Գյումրի քաղաքից են, ինչը հիմք է տալիս ենթադրելու, որ դրանք գոյություն չունեցող ընթերականեր են: Բացի այդ առանց համապատասխան գիտելիքների առկայության քննիչը կամայականորեն ձեռնպահ է մնացել առգրավված հիշողության կրիչը կամ, ինչպես նշված է վերևում, պրոցեսորը իրեղեն ապացույց ճանաչելուց` առանց ենթադրելու, որ հասարակ զննությամբ չհայտնաբերված տվյալները, որոնք հեռացվել են համակարգչի հիշողությունից կարող են վերականգնվել համապատասխան մասնագետների կողմից:
.
Այս կապակցությամբ միջնորդում ենք.
.
1. Բոլոր առգրավված իրերը, այդ թվում՝ “Հարսնաքար” ռեստորանային համալիրի տեսաձայնագրման համակարգին միացված համակարգչի պրոցեսորը ճանաչել իրեղեն ապացույց` համաձայն ՀՀ քրեական դատավարության օրենսգրքի 115-րդ հոդվածի, կցել գործին և ստուգման ենթարկել առգրավված իրերի և իրեղեն ապացույցների պահպանության ապահովման հարցը` ՀՀ քրեական դատավարության օրենսգրքի 116, 117 -րդ հոդվածների պահանջների համաձայն:
.
2. Պարզել վերոնշյալ պրոցեսորի, հիշողության կրիչի անհատականացման տվյալները, գործարանային սերիական համարները:
3. Կատարել “Հարսնաքար” ռեստորանային համալիրի առգրավված տեսաձայնագրման համակարգին միացված համակարգչի պրոցեսորի կրկնակի հետազոտություն՝ պարզելու, թե արդյոք քննիչի կողմից կատարված զննությունը եղել է ամբողջական: Այս կապակցությամբ, համաձայն ՔԴՕ 350-րդ հոդվածի` միջնորդում ենք տեղանքի և “Հարսնաքար” ռեստորանային համալիրի շենքի զննություն:
.
4. Պարզել արդյոք “Հարսնաքար” ռեստորանային համալիրի տեսաձայնագրման համակարգին միացված համակարգչի պրոցեսորի առգրավման և զննության վերաբերյալ կազմված արձանագրություններում նշված ընթերականերն իրականում գոյություն ունեն և, եթե այո, դատակոչել այդ անձանց (Հովհաննես Գեղամի Բարսեղյան /ծնվ.՝ 1955թ. բնակվող՝ ք. Գյումրի/, Արկադի Նիկոլայի Սեմյոնով /ծնվ.՝ 1964թ. բնակվող՝ ք. Գյումրի/ ):
.
5. Նշանակել համապատասխան փորձաքննություն` պարզելու, թե արդյոք առգրավված համակարգչի հիշողության կրիչում պահպանվել են տվյալներ հանցագործության կատարման օրվա դրությամբ (17.06.2012), և եթե ոչ, ապա հնարավոր է, որ դրանք հեռացված լինեին կամ փոփոխված լինեին առկա ֆայլերի ստեղծման ամսաթվերը: Բացի այդ, փորձագետներից ճշտել` արդյոք կարող են դրանք վերականգնվել և համապատասխան մասնագետներին հանձնարարել վերականգնել հիշողության կրիչի վրայից հեռացված ողջ տեղեկատվությունը:
.
6. Կատարել «Հարսնաքար» ռեստորանային համալիրի տարածքի ամբողջական զննութուն՝ պարզելու, թե որտեղ են տեղակայված եղել տեսախցիկները կամ հանցագործության դեպքից հետո տեսախցիկների ապամոնտաժման դեպքում, որ մասում են դրանք տեղակայված եղել,
.
7. Առգրավել ռեստորանային համալիրում եղած բոլոր պրոցեսորները և արդեն իսկ առգրավված պրոցեսորի հետ մեկտեղ ներկայացնել մասնագետներին՝ պարզելու, թե արդյոք այդ կրիչների վրա պարունակվում են դեպքի օրվա տեսաձայնագրության ֆայլեր, իսկ դրանց բացակայության դեպքում պարզել՝ արդյոք դրանք չէին կարող ջնջված լինել էլեկտրոնային կրիչներից:
.
8. Բացի այդ, նաև համեմատական ստուգման ենթարկել առգրավված պրոցեսորի ժամանակագրական կարգավորումների և իրական ժամանակի միջև առկա տարբերությունները, ինչպես նաև պարզել՝ արդյոք կատարվել են ժամանակի կարգավորման փոփոխություններ: Համապատասխան փորձագետ-մասնագետներին հանձնարարել պարզել կրիչների պարունակությունը և վերականգնել այդ հիշողության կրիչների ողջ տեղեկատվությունը:
.
9. Նշանակել դատահամակարգչա-տեխնիկական փորձաքննություն:
,
2. Ըստ դեպքի վայրի զննության արձանագրության` այն կատարվել էր 19.06.2012թ. և բացակայել են գրառումներ արյան հետքերի առկայության վերաբերյալ, այնինչ տուժողների դատաբժշկական փորձաքննության եզրակացություններից երևում է, որ նրանցից առնվազն երեքը ստացել են քթի կոտրվածք, ինչի առկայության պարագայում բավական մեծ քանակի արյան արտահոսք է լինում, ինչն ապացուցում է նաև գործով, որպես միակ իրեղեն ապացույց ճանաչված, տուժող Արտակ Բայադյանի վերնաշապիկը, որն ամբողջությամբ պատված է արյան հետքերով: Այդուհանդերձ, արյան հետքերի բացակայությունը վարույթ իրականացնող մարմնի մոտ ոչ մի կասկած չի առաջացրել առ այն, որ դրանք հնարավոր է, որ դիտավորյալ վերացված լինեն: Այս պարագայում ևս ակնկալվում էր անհապաղ անդրադարձ այդ փաստին՝ հաշվի առնելով դեպքի վայրի պահպանության օրենսդրական պահանջը:
Դեպքի վայրի զննության արձանագրության կապակցությամբ կարևոր է նաև այն հանգամանքը, որ այն կատարվել է տուժողներից միայն Էդգար Նիկոյանի մասնակցությամբ, ինչն իր հերթին վկայում է այն մասին, որ նախաքննության մարմինը չի ձեռնարկել անհրաժեշտ բոլոր միջոցները բազմակողմանի լրիվ և օբյեկտիվ նախաքննություն ապահովելու նպատակով:
Սույն գործով էական նշանակություն ունեցող հարցեր են նաև տուժողների և կասկածյալների և մեղադրյալների հագուստի առգրավում իրականացնելու և դրանք որպես իրեղեն ապացույց ճանաչելու հարցերը: Այդ կապակցությամբ ևս առկա է քննչական մարմնի բացթողումը, ինչն արդյունք է ոչ մի կերպ չարդարացված ինքնավստահության: Մասնավորապես՝ քննիչն, առգրավելով ոչ թե տուժողների ողջ հագուստը, այլ դրա միայն մի մասը, արդեն իսկ կատարել է անթույլատրելի սխալ: Այնուհետև, չունենալով համապատասխան մասնագիտական գիտելիքներ որոշելու համար, թե արդյոք այդ հագուստը կարող է համարվել ըստ ՀՀ քր. դատ. օր-ի 115-րդ հոդվածի 1-ին մասի առարկա, որոնք իրենց վրա հանցագործության հետքեր են պահպանել կամ որոնք կարող են հանցագործությունը հայտնաբերելու, գործի փաստական հանգամանքները պարզելու, մեղավորներին ի հայտ բերելու միջոցներ ծառայել` որոշել է ձեռնպահ մնալ դրանք իրեղեն ապացույց ճանաչելու որոշում կայացնելուց, այդ անգործությամբ ևս մեկ անգամ սահմանափակելով նախաքննության բազմակողմանիությունն ու լրիվությունը: Այս կապակցությամբ միջնորդում ենք.
.
1. Արձանագրել, որ անհայտ հանգամանքներում և անհայտ անձանց կողմից դեպքի վայրում ոչնչացվել են հանցագործության հետքերը, ինչը համապատասխանում է ՀՀ քր. օր. 334-րդ հոդվածով նախատեսված հանցագործության հատկանիշներին:
.
2. Իրականացնել տեղազննություն անհրաժեշտ վկաների և բոլոր տուժողների մասնակցությամբ:
.
3. Տուժողների հագուստը ճանաչել իրեղեն ապացույց` համաձայն ՀՀ քրեական դատավարության օրենսգրքի 115-րդ հոդվածի, կցել գործին և ստուգման ենթարկել առգրավված իրերի և իրեղեն ապացույցների պահպանության ապահովման հարցը` ՀՀ քրեական դատավարության օրենսգրքի 116, 117 -րդ հոդվածների պահանջների համաձայն:
.
4. Նշանակել նաև համապատասխան կենսաբանական (մասնիկաբանական) փորձաքննություն տուժողների և մեղադրյալների հագուստի վրա առկա միկրո մասնիկների, մանրաթելերի առկայությունը պարզելու համար, ինչը հնարավորություն կընձեռի ավելի որոշակիացնել թե կոնկրետ ով ում է հպվել վիճաբանության և ծեծի ընթացքում:
.
.
3. Համաձայն Ռուբեն Հայրապետյանի` 6.07.2012թ. տված ցուցմունքի (I հատոր գ. թ. 184-185)` նա 2012թ. հունիսի 17-ին գտնվել է Սևանում, այնտեղից վերադառնալուց հետո, ժամը 19.00-ի մոտակայքում կարճատև ժամանակով գտնվել է “Հարսնաքար” ռեստորանային համալիրում, իսկ այնուհետև` ՀՖՖ-ի “Տեխնիկական կենտրոն Ակադեմիայում”: Ինչպես երևում է “Վիվասել”-ի տրամադրած հեռախոսային վերծանումներից` տվյալ հեռախոսային օպերատորի ալեհավաքները ցույց են տալիս, որ նույն օրը, կեսօրին “Հարսնաքար” ռեստորանային համալիրի, այսպես կոչված, աշխատակիցներ Արթուր Բաբլոյանը, Նորայր Հայրապետյանը, Արման Խաչատրյանը, Արման Բաղդասարյանը, Գարիկ Մարգարյանը նույնպես կեսօրից, մոտ ժամը 14.00-ից մինչև մոտ ժամը 19.00 գտնվել են Սևանում` ենթադրաբար այնտեղ ուղեկցելով Ռուբեն Հայրապետյանին: Ըստ “Beeline” /Արմենտել/ և “Vivacell-MTS” ընկերությունների տրամադրած հեռախոսային վերծանումների` Արթուր Բաբլոյանի, Նորայր Հայրապետյանի, Արման Խաչատրյանի, Արման Բաղդասարյանի և Գարիկ Մարգարյանի երթուղին ենթադրաբար նույնն է, ինչ Ռուբեն Հայրապետյանինը, քանի որ, դատելով ալեհավաքների տվյալներից, նրանք ժամը 19.30-22.40-նն ընկած ժամանակահատվածում, գտնվել են “Հարսնաքար” ռեստորանի և/կամ ՀՖՖ ակադեմիայի տարածքում: Դա հիմնավորվում է նաև Նորայր Հայրապետյանի ցուցմունքով /I հատոր, գ.թ. 244/՝ համաձայն որի` ինքը և մեղադրյալներ Արման Բաղդասարյանը, Արթուր Բաբլոյանը և Արման Խաչատրյանը հանցագործության կատարման պահին մոտ ժամանակահատվածում, սպանությունից առաջ միասին գտնվել են “Հարսնաքար” ռեստորանային համալիրի մոտ գտնվող ՀՖՖ ակադեմիայում, որտեղից “Հարսնաքար” ռեստորանային համալիրի տարածք են եկել PRADO մակնիշի ավտոմեքենայով: Ըստ Ռուբեն Հայրապետյանի ցուցմունքի և հեռախոսային խոսակցությունների վերծանումների՝ նա այդ ժամին նույնպես գտնվել է ՀՖՖ ակադեմիայում, իսկ, հաշվի առնելով այն հանգամանքը, որ Ռ. Հայրապետյանը դեռ գտնվում էր ՀՖՖ ակադեմիայում՝ ապա Նորայր Հայրապետյանը և նշված անձինք չէին կարող ուղղակի տուն գնալիս լինել, քանի որ նրանք ուղղակիորեն հանդիսանում էին Ռ. Հայրապետյանի, այսպես կոչված, թիկնապահները: Բացի այդ, այն, որ Արթուր Բաբլոյանն ու Արման Խաչատրյանն ուղղակիորեն հանդիսանում էին Ռ. Հայրապետյանի թիկնապահները, փաստվում է նաև մեղադրյալ Դավիթ Ադամյանի ցուցմունքով /I հատոր, գ.թ. 134/: Ռուբեն Հայրապետյանի առնչությունն այս հանցագործությանը պետք է կասկածի տակ դրվեր հենց այն հանգամանքի բերումով, որ նույնիսկ իր անձնական թիկնազորի անդամ հանդիսացող Գարիկ Մարգարյանին Վահե Ավետյանին ծեծի ենթարկելու վերաբերյալ հրահանգ ունենալու և Ռուբեն Հայրապետյանի կողմից Վահե Ավետյանին ծեծի ենթարկելու պահին “Հարսնաքար” համալիրում գտնվելու վերաբերյալ հարցին` Գարիկ Մարգարյանն ուղղակիորեն հրաժարվել է պատասխանել: Եթե Ռ. Հայրապետյանն իրապես առնչություն չուներ այս հանցագործությանը, ապա ինչն էր խանգարում նրա <զինվորներից> մեկին այդ առնչությունը հերքելուն: Առնվազն տարակուսելի է, թե ինչպես իրենց քննչական պաշտոնի էլիտան համարող ՀԿԳ քննության վարչության քննչական խումբը` Ռուբեն Մկրտչյանի գլխավորությամբ, Ռուբեն Հայրապետյանին հարցաքննելիս, հարց չեն տվել վերջինիս, թե ինչպես կարող էին “Հարսնաքարում” որպես անվանգության աշխատակիցներ և վարորդ-առաքիչ ձևակերպած անձինք այդպես հեշտորեն անտեսել ռեստորանի անվտանգությունը և Ռուբեն Հայրապետյանի հետ միասին ճամփորդել Սևան և հետ: Ի լրումն սրա` “Հարսնաքար” ռեստորանային համալիրի մի շարք աշխատակիցների ցուցմունքներից ակնհայտ է դառնում, որ նրանք չեն ճանաչում մեղադրյալներ Արման Խաչատրյանին, Արման Բաղդասարյանին, Արթուր Բաբլոյանին, Նորայր Հայրապետյանին և Գարիկ Մարգարյանին որպես ռեստորանի անվտանգության աշխատակիցներ: Այսպես` երգիչ Էդգար Գրիգորյանը նշում է, որ ռեստորանի անվտանգության աշխատակիցներին գիտի միայն դեմքերով: Անունով ճանաչում է միայն Նորայրին և “Կյաժին” /Արման Խաչատրյանին/: Երգիչ Կարապետ Պոլոյանը նույնպես անվտանգության աշխատակիցներին գիտի միայն դեմքերով /III հատոր, գ.թ. 159/: Մատուցող Պավել Հարությունյանն անվտանգության աշխատակիցներին չի ճանաչում /III, գ.թ.163/, ռեստորանի անվտանգության աշխատակիցներին չի ճանաչում և նրանց հետ շփում չունի նաև երաժիշտ Էդուարդ Գրիգորյանը /III հատոր, գ.թ. 166/: Մատուցող Մանուկ Մնացականյանը ռեստորանի անվտանգության աշխատակիցներից ճանաչում է միայն Գարիկին, այն էլ` միայն դեմքով /III-րդ հատոր, գ.թ. 168/: Ռեստորանի անվտանգության աշխատակիցներին չի ճանաչում և նրանց անունները չգիտի նաև մատուցող Հայկ Ազատիկյանը /III հատոր, գ.թ. 160/: Հաշվի առնելով այս հանգամանքները` գտնում ենք, որ կան հիմնավոր կասկածներ, որոնք թույլ են տալիս ենթադրել, որ հիշյալ անձինք չեն հանդիսանում “Հարսնաքար” ռեստորանային համալիրի անվտանգության աշխատակիցները, այլ` Ռուբեն Հայրապետյանի անձնական թիկնապահները, որպիսի կարգավիճակով էլ ուղեկցել են նրան Սևան: Սևանից վերադառնալուց հետո նույնպես վերջինս տեղաշարժվել է վերոհիշյալ հինգ և գուցեև ավելի անձանց ուղեկցությամբ և, հակառակ իր պնդումների, առնվազն տեղյակ է եղել դեպքի մանրամասներին:
.
Հաշվի առնելով նաև այն հանգամանքը, որ համաձայն քրեական գործում առկա ցուցմունքների՝ հանցագործությանը մասնակից անձանց մի մասը հանցագործության վայր է կանչվել կամ եկել ՀՖՖ ակադեմիայի տարածքում գտնվող մարզադահլիճից՝ ապա առնվազն տարօրինակ է, որ նախաքննության մարմնի կողմից ձեռք չեն բերվել ՀՖՖ ֆուտբոլի ակադեմիայի տարածքում տեղակայված տեսաձայնագրիչ սարքերի տեսագրությունները, որոնցով կփաստվեր և կորոշակիացվեր այն անձանց շրջանակը, որոնք հանցագործության վայր են գնացել նույն շենքում գտնվող մարզադահլիճից:
.
1. Այս կապակցությամբ միջնորդում ենք, որպեսզի դատարանը ձեռք բերի այդ տեսագրությունները և կատարվի դրանց վերծանումը:
..
4. Սույն քրեական գործի շրջանակներում և՛ դրա մեղադրյալների, և՛ վկաների ցանկը լայնորեն առնչվում է 3 կազմակերպությունների` “Դավիթ ԴՎՍ” ՍՊԸ-ի, Հայաստանի ֆուտբոլի ֆեդերացիա ՀԿ-ի, ՀՖՖ տեխնիկական կենտրոն-ակադեմիա հետ, ինչպիսի պայմաններում անհրաժեշտ է պարզել հենց այս կազմակերպություններին պատկանող հեռախոսահամարների ցանկը, որոնցից կամ որոնց վրա կարող էին լինել հանցագործություն կատարած անձանց կամ հանցագործություն կատարած անձանց կողմից կանչվող կամ նրանց կանչող զանգերը, որոնք, ինչպես իրավացիորեն նշված է II հատոր գ.թ. 141-ում պարունակվող միջնորդության մեջ, կարող են պարունակվել կատարված հանցագործության բացահայտման համար ապացուցողական նշանակություն ունեցող տեղեկություններ և միջոց ծառայել հանցագործության մյուս մասնակիցներին պարզելու համար:
.
Առհասարակ, սույն քրեական գործում հեռախոսահամարների նույնականացման հետ կապված իրողությունը զավեշտալի է նաև այն իմաստով, որ կասկածյալ, իսկ հետագայում նաև մեղադրյալ անձանց կողմից օգտագործված հեռախոսահամարները ճշտվել են ոչ այլ կերպ, քան հենց այդ անձանց կատարած հայտարարությունների և նրանց մոտ հայտնաբերված համարների վրա: Այս կապակցությամբ հարկ է նկատել, որ նախաքննության մարմնի կողմից ոչ մի ջանք չի գործադրվել պարզելու համար, թե արդյոք մեղադրյալների մոտ այլ հեռախոսահամարներ եղել են, թե չէ, և պարզել այդ հեռախոսահամարների վրա և դրանցից դուրս եկած զանգերի ցանկը: Ավելին` մեղադրյալներ Գարիկ Մարգարյանի և Արթուր Բաբլոյանի կողմից օգտագործված Beeline համարների վերծանումներից պարզելով, որ նրանց հեռախոսահամարներից զանգեր են արվել մեղադրյալ Նորայր Հայրապետյանին պատկանող 091 208566 հեռախոսահամարին` նախաքննության մարմինը հարկ չի համարել միջոցներ ձեռնարկել ստանալու նաև այս հեռախոսահամարի վերծանումը: Նույն ոգով նաև անուշադրության են մատնվել մեղադրյալ Արթուր Բաբլոյանի կողմից սույն թվականի հունիսի 19-ին առավոտյան 11:47 Ռուբեն Հայրապետյանի բնակության հասցեով /Բաբաջանյան 1/ գրանցված 623190 համարին կատարված զանգը: Հարկ է նկատել, որ երբ հանրության կողմից բազմիցս կոչեր և հարցումներ են արվել, թե արդյոք սույն գործով վկա Ռուբեն Հայրապետյանի հեռախոսազանգերի վերծանումները ձեռք են բերվել, թե ոչ, նախաքննության մարմնի կողմից շարունակաբար պատասխանվել է, որ նման տեղեկություններ կարող են ձեռք բերվել միայն կասկածյալի կամ մեղադրյալի կարգավիճակ ունեցողների վերաբերյալ: Այս պայմաններում առնվազն տարօրինակ է, թե ինչու և ինչպես է նախաքննության մարմինը միջնորդություն հարուցել պարզելու այն հեռախոսահամարների վերծանումը, որոնց տիրապետողների վերաբերյալ միջնորդությունը հարուցելու պահին ոչ մի պաշտոնական կասկած կամ մեղադրանք չի ունեցել:
.
Այս կապակցությամբ միջնորդում ենք ձեռնարկել համապատասխան միջոցներ` պարզելու, թե.
.
1. Որ հեռախոսահամարներն են պատկանում «Դավիթ ԴՎՍ» ՍՊԸ-ին, Հայաստանի ֆուտբոլի ֆեդերացիա ՀԿ-ին, ՀՖՖ տեխնիկական կենտրոն-ակադեմիային,
.
2. Օրենքով սահմանված կարգով պահանջել վերը նշված կազմակերպություններին, Ռուբեն Հայրապետյանին և Նորայր Հայրապետյանին պատկանող հեռախոսահամարներին դեպքի օրը, դրան նախորդող և հաջորդող օրերին կատարված հեռախոսազանգերի (մուտքային և ելքային) վերծանումները,
.
3. Առաջարկել Ռուբեն Հայրապետյանին, որպեսզի նա ինքը կամավոր ներկայացնի իրեն պատկանող և իր կողմից օգտագործվող հեռախոսահամարների վերծանումները՝ հանցագործության օրվա և դրան հաջորդող օրերի դրությամբ: Կամավորության հիմունքներով դրանք չտրամադրելու դեպքում միջնորդում ենք դատարանին համապատասխան հեռախոսային օպերատորներից պահանջել հիշյալ վերծանումները,
.
4. Ինչ հեռախոսահամարներ են պատկանում սույն գործով մեղադրյալներին առհասարակ, և այն դեպքում, երբ այդ հեռախոսահամարների զանգերի վերծանումները սույն գործով առկա չեն, օրենքով սահմանված կարգով պահանջել և ստանալ դրանք,
.
5. Բջջային օպերատորներից պահանջել նաև տեղանքում գտնվող բոլոր ալեհավաքների վերաբերյալ տեխնիկական տվյալներ, մասնավորապես` թե որը կոնկրետ ինչ շառավղով է սպասարկում իրականացնում:
.
5. Ի լրումն սրա` գործում առկա, այսպես կոչված, աշխատանքային պայմանագրերից` կնքված “Հարսնաքարի” տնօրեն Հրաչ Զոհրաբյանի և մեղադրյալների միջև, ակնհայտ է դառնում, որ պայմանագրերն իրականում կազմված են հետին թվով, դրանց վերջում առկա ստորագրություններն ակնհայտորեն կեղծված են և տարբերվում են դատավարական փաստաթղթերում առկա` մեղադրյալների իրական ստորագրություններից: Համոզված ենք, որ կեղծ պայմանագրերը կցված են գործին` թաքցնելու այն հանգամանքը, որ առնվազն Ռուբեն Հայրապետյանին Սևան ուղեկցած հինգ անձինք չեն հանդիսանում “Հարսնաքարի” աշխատակիցներ: Մասնավորապես` Նորայր Հայրապետյանը հարցաքննության ժամանակ հայտարարել էր, որ չի աշխատում, սակայն գործում առկա է նրա և “Հարսնաքարի” տնօրենի միջև կնքված պայմանագիրն այն մասին, որ նա հանդիսանում է նույն ռեստորանի անվտանգության աշխատակից, իսկ գործի II հատորի 102-րդ թերթի դատարանի որոշմամբ արձանագրված է, որ նա հայտարարել է, որ հանդիսանում է ՀՖՖ ակադեմիայի անվտանգության աշխատակից: Արման Խաչատրյանը, ըստ իր որոշ հայտարարությունների, չի աշխատում, այնինչ այլ հայտարարությունների համաձայն` հանդիսանում է “Էլմիր” ՍՊԸ-ի տնօրենը, և ըստ իր որոշ ցուցմունքների` Ռուբեն Հայրապետյանի մոտ անվտանգության աշխատակից է աշխատում 3-4 տարի /I հատոր, գ.թ. 241/: Միևնույն ժամանակ, քրեական գործում առկա է աշխատանային պայմանագիր` կնքված “Դավիթ ԴՎՍ” ՍՊԸ-ի համալիրի տնօրեն Հրաչ Զոհրաբյանի և Արման Խաչատրյանի միջև: Հետաքրքրարժան է, որ հակառակ Արման Խաչատրյանի և մատուցող Դավիթ Ադամյանի ցուցմունքների այն մասին, որ Արման Խաչատրյանը Ռուբեն Հայրապետյանի անվտանգության աշխատակից/թիկնապահն է, գործում առկա են գրություններ գրված ՀՀ ոստիկանության ՔԳՎ ՀԿԳ քննության վարչության պետ Վահագն Հարությունյանի և նույն վարչության Մարդու դեմ ուղղված հանցագործությունների բաժնի պետ Արսեն Այվազյանի կողմից` թվագրված 19.06.2012թ., որով վերջիններս, չունենալով և ոչ մի հիմք, անհասկանալի պատճառներով որոշում են, որ “Կյաժ” մականունով Արման Խաչատրյանը “Հարսնաքար” ռեստորանային համալիրի անվտանգության աշխատակից է:
.
Ի լրումն սրա` մեղադրյալ Արման Բաղդասարյանն իր ցուցմունքում հայտարարում է, որ ինքը վարորդ է /II հատոր, գ.թ. 44/, մինչդեռ նույն Հրաչ Զոհրաբյանի հետ ունի պայմանագիր, որտեղ նշված է, որ ինքն ընկերության անվտանգության աշխատակից է: Ակնհայտորեն, նշված և ոչ մի զբաղմունքը ճիշտ չէ, իսկ մեղադրյալներ Նորայր Հայրապետյանը, Արման Խաչատրյանը, Արման Բաղդասարյանը, Գարիկ Մարգարյանը և Արթուր Բաբլոյանը թաքցրել են այն հանգամանքը, որ հանդիսանում են Ռուբեն Հայրապետյանի անձնական թիկնազորի անդամներ` ակնհայտորեն նպատակ ունենալով թաքցնելու Ռուբեն Հայրապետյանի` սույն հանցագործությանը որևէ առնչություն ունենալու հանգամանքը:
.
Հաշվի առնելով նաև այն հանգամանքը, որ համաձայն քրեական գործում առկա ցուցմունքների՝ հանցագործությանը մասնակից անձինք եղել են “Հարսնաքար” ռեստորանի անվտանգության աշխատակիցներ և նրանց թիվը եղել է 15 հոգու սահմաններում` չի երևում նաև քննչական խմբի գործադրած ջանասիրությունը չգրանցված, սակայն իրականում այդ համալիրում անվտանգության աշխատակցի գործառույթներ իրականացնող բոլոր անձանց բացահայտելու ուղղությամբ: Ակնհայտ է, որ այդ հսկայական ռեստորանային համալիրի անվտանգությունն անհնար էր ապահովել չորս աշխատակցի միջոցով: Բացի այդ, հաշվի առնելով նաև այն հանգամանքը, որ գործում եղած աշխատանքային պայմանագրերը կնքված են սկսած սույն թվականի ապրիլ ամսից` ողջամիտ կասկած է առաջանում առ այն, որ կան այլ աշխատակիցներ և այս կապակցությամբ վարույթն իրականացնող մարմինը պետք է համապատասխան միջոցներ ձեռնարկեր՝ պարզելու բոլոր աշխատակիցների ցուցակը: Հաշվի առնելով վերոգրյալը` միջնորդում ենք
.
1. Պահանջել <<Հարսնաքար>> ռեստորանային համալիրի ողջ փաստաթղթաբանությունը, ռեստորանային համալիրում տեղի ունեցած միջոցառումներին առնչվող, ինչպես նաև դրա անձնակազմին վերաբերող բոլոր փաստաթղթերը, ներառյալ` ժամանակավոր բոլոր գրառումները` կապված տարբեր միջոցառումների համար նախնական պատվերների ընդունման հետ՝ պարզելու դեպքի օրվա դրությամբ համալիրում տեղի ունեցած միջոցառումներին ներկա գտնված անձանց ցանկը, ինչպես նաև ամբաստանյալների իրական աշխատանքի վայրը,
.
2. Համապատասխան հարցմամբ սոցիալական ապահովության պետական ծառայությունից և հարկային մարմիններից պահանջել <<Դավիթ ԴՎՍ>> ՍՊԸ-ում և ՀՖՖ Ակադեմիայում գրանցված աշխատակիցների վերաբերյալ համապատասխան տվյալներ,
.
3. Որոշում ընդունել թիվ 17115012 քր. գործի առաջին հատորի Գ.Թ. 44, 45, 46, 47 էջերում պարունակվող ընթերակաների վերաբերյալ գրառումները, ընթերակաների ստորագրությունները, ինչպես նաև քրեական գործում առկա աշխատանքային պայմանագրերում առկա ստորագրությունները կատարողին(ներին) պարզելու համար դատաձեռագրաբանական փորձաքննություն նշանակելու մասին: Ընդ որում անհրաժեշտ է որպեսզի փորձաքննության նմուշներ ներկայացնեն նաև այդ փաստաթղթերը կազմած կամ վերոնշյալ քրեական գործին կցած քննիչները,
.
4. Փաստաթղթաբանական փորձաքննություն նշանակելու մասին՝ պարզելու աշխատանքային պայմանագրերի և զննման արձանագրության պատրաստման եղանակը, ժամանակը և մեթոդը, ինչպես նաև ստորագրությունները կատարած անձին կամ անձանց: Փաստաթղթաբանական փորձաքննության է անհրաժեշտ ենթարկել նաև <<Հարսնաքար>> ռեստորանային համալիրի աշխատանքային պայմանագրերը, որպես աշխատող հաշվառված անձանց վերաբերյալ կազմված անհատական հաշվետվության թերթիկները, եկամտահարկի, շահութահարկի, սոցիալական ապահովության վճարների կապակցությամբ կազմված փաստաթղթերը, ինչպես նաև դրանց հետ փոխկապակցված բոլոր փաստաթղթերը, որոնց ամբողջական ցանկը պարզ կդառնա սույն միջնորդությամբ պահանջված բոլոր փաստաթղթերը ձեռք բերելուց հետո:
.
6. Սույն գործով տարակուսելի է նաև Վահե Ավետյանի դատաբժշկական փորձաքննության եզրակացությունը, որի “Հետևություններ” բաժնում արձանագրված է. “նման վնասվածքները կենդանի անձանց մոտ սովորաբար համարվում են` առողջությանը ծանր վնաս պատճառող, կյանքին վտանգ սպառնացող ինչպես առանձին-առանձին, այնպես էլ միասին վերցրած, իսկ տվյալ դեպքում` բերել են մահվան”: Ոլորտի լրջագույն մասնագետների հավաստմամբ` Վահե Ավետյանի մոտ ծեծից անմիջապես հետո առկա է կյանքի հետ անհամատեղելի վնասվածք և այնպիսի բժշկական ախտանիշերը, տվյալները, ինչպիսիք են հավասարաչափ լայնացած և միջին գծով ֆիքսված բբերը, կոռնեալ ռեֆլեկսների բացակայություն, ցավային գրգիռների նկատմամբ ռեակցիայի բացակայությունը, գլխուղեղի մոտ 4,0 սմ դիսլոկացիա համախտանիշ աջից ձախ և, վերջապես, դիֆուզ աքսոնալ ախտահարումը խոսում են բոլոր դեպքերում կյանքի հետ անհամատեղելի վնասվածքի մասին, ավելի կոնկրետ՝ մահվան առաջին ախտանիշերի, այլ ոչ թե վնասվածքի, որը տվյալ դեպքում բերել է մահվան: Վերոգրյալն են հիմնավորում նաև Վահե Ավետյանի առաջնային բուժ զննության արձանագրությունը, կատարված ԿՏ հետազոտությունը, առաջին վիրահատության հիմնավորումը, վիրահատության նկարագրություն-արձանագրությունը, երկրորդ վիրահատության հիմնավորումը, վիրահատության նկարագիր-արձանագրությունը, որոնցով արձանագրված է Վահե Ավետյանի, սկսած առաջին բուժ զննությունից, ծայրահեղ ծանր վիճակում գտնվելը, ինչին ըստ դասակարգման հաջորդում է մահվան վիճակը: Բացի այդ, վերոգրյալը վկայում է նաև այն մասին, որ մահը վրա է հասել ոչ թե ծանր վնասվածքի և դրա հետևանքների զարգացման պատճառով, այլ կյանքի հետ անհամատեղելի վնասվածքը չեզոքացնելու անհնարինության հետևանքով: Այս կապակցությամբ միջնորդում ենք.
.
1. ՀՀ քր. դատ. օր-ի 245, 251-րդ հոդվածներով, Վահե Ավետյանի դատաբժշկական փորձաքննության եզրակացության նկատմամբ նշանակել կրկնակի հանձնաժողովային փորձաքննություն` ներգրավելով հանրապետության բոլոր հիվանդանոցների նյարդավիրաբուժական բաժանմունքների ղեկավարներին,
.
2. Որպես իրեղեն ապացույց ճանաչել նաև Վահե Ավետյանի վիրահատության տրեպանացիայի արդյունքում հանված գանգոսկրի, ինչպես նաև մաշկի համապատասխան հատվածը, որոնք նկարագրված են դատաբժշկական եզրակացության մեջ:
.
Ելնելով վերոգրյալից և առաջնորդվելով ՀՀ քրեական դատավարության օրենսգրքի 78-79-րդ, 125-րդ, 267-րդ, 331-րդ հոդվածներով
.
Խնդրում ենք
.
Ամբողջությամբ բավարարել վերոշարադրյալ միջնորդությունները և արդյունքում ձեռք բերված ապացույցները կցել սույն քրեական գործին, ինչը թույլ կտա բացահայտել հանցագործության ամբողջական պատկերը:
.
Ներկայացուցիչներ՝
Տիգրան Էդուարդի Եգորյան
Վահե Գրիգորյան
Լուսինե Հակոբյան»:
.
Աղբյուրը` Իրավաբան.net

Ռուբեն Հայրապետյանին որքան էլ «ծածկեն»

Զարուհի, օրերս Դուք Հայաստանի ֆուտբոլի ֆեդերացիայի մուտքի մոտ ջութակ նվագեցիք: Հիմա արդեն առաջարկներ են հնչում խմբակային գնալ համանման ակցիա կազմակերպելու: Ո՞ւմն էր գաղափարը:
Ռուբեն Հայրապետյանն իր ասուլիսներից մեկում խոսում է ծեծելու և ջութակ նվագելու մասին, հակադրում է` հեգնելով, թե բնական է, որ իր նման մարդը պետք է պատժի ու ծեծի, այ կարելի է զարմանալ, եթե ջութակ նվագի: Այդ մշակութային հակադրությունը շատ հատկանշական է Ռուբեն Հայրապետյանի տիպաբանության մարդկանց համար: Ես դեռ մանկուց հիշում եմ, թե ինչպես էին թաղային հեղինակություն ունեցող տղաները ծաղրում ջութակահարներին, նրանց ամեն կերպ փորձում նվաստացնել, քանի որ ոչ թե ծեծող էին, այլ՝ նվագող, հանրության առջև իրենց զգացմունքներն ու հույզերը, մարդկային կերպարը բացող, այլ ոչ իրենց բիրտ ուժը ցուցադրող: Իսկ զգացմունքը ցածր հոգեկերտվածքի տեր մարդկանց համար ամոթ բան է, թուլության նշան, էլ ի՞նչ «տղամարդ», որ պիտի սիրի, այլ ոչ բռնությամբ տիրի: Հարսնաքարի միջադեպից հետո, երբ ամեն կերպ նախաքննության մարմինն ամեն ինչ արեց, որպեսզի Ռուբեն Հայրապետյանը գործում չներգրավվի որպես կասկածյալ, նրա ասուլիսն ակտիվորեն մտավ համացանցային շրջանառության մեջ: Գրող Տաթև Չախչախյանը Ֆեյսբուքյան իր էջում գրեց, թե ո՞վ ջութակ նվագել գիտի, բնականաբար ես արձագանքեցի` ասելով, որ կոնսերվատորիայի շրջանավարտ եմ, սակայն այդ պահին մենք ակտիվ հրապարակային գործողություններով լուծում էինք Ռուբեն Հայրապետյանի մանդատազրկման հարցը: Եվ երբ նրա անձեռնմխելիության հարցը քաղաքացիական հանրության ճնշման տակ լուծվեց վերջնականապես, մնաց նրա աշխատանքի մյուս վայրը՝ Հայաստանի ֆուտբոլի ֆերդերացիան, և կարծում եմ, որ ֆուտբոլի ֆեդերացիայի նախագահը երբեք բռնության քարոզիչ ու բռնության մշակույթի կրող չպիտի լինի: Ջութակի մասնակցությամբ ակցիայով մենք հակադրեցինք կյանքի մշակույթը՝ բռնության մշակույթին:
Նախաձեռնության մի քանի անդամներ Ռուբեն Հայրապետյանի դեմ հայց ներկայացրին, այս տեսակ քայլերով ի՞նչ արդյունքներ կարելի է գրանցել, որքանո՞վ զսպաշապիկի դեր կկատարեն:
Ես շատ եմ կարևորում պայքարը իրավական դաշտում, քանի որ երկրում անպատժելիության մթնոլորտի փոփոխության միակ ճանապարհն ամեն քաղաքացու իրավագիտակցության բարձրացումն է: Նույն քաղաքացիների խումբն է աշխատում դատական հայցերի ուղղությամբ ևս: Ռուբեն Հայրապետյանն անվանական ահաբեկել է ակտիվիստների ընտանիքներին՝ նրանց գլխին լուտանքներ տեղալով և շեշտելով, որ նրանց ընտանիքները հանգիստ չեն ունենալու, սա մարդկանց իրավունքների խախտում է, որին չեն արձագանքել իրավապահ մարմինները: Որևէ պատժամիջոց չի կիրառվել քաղաքացիների հետ ահաբեկչի լեզվով խոսողի նկատմամբ: Այդ իսկ պատճառով մենք ենք քաղհայցեր ներկայացնում:
Զարուհի, սակայն վարչապետը և նախագահն ապատժելիության մթնոլորտը կանխելու փորձեր են անում, հնարավո՞ր է այս գործը որոշեն արդար քննել:
Ոչ թե հնարավոր է, այլ պետք է այս գործը արդար քննեն, և դա ոչ թե իշխանավորների բարի կամքից է կախված, այլ հանրային հստակ ձևակերպված պահանջ է: Արդեն նախաքննության մարմինը գործը տարել է կոծկման ճանապարհով, ու հաշվի չեն առնվել կարևորագույն հանգամանքներ: Մենք Վահե Ավետյանի իրավահաջորդի փաստաբանների միջնորդություններից տեսնում ենք, թե ինչպիսի աղաղակող խախտումներ են տեղի ունեցել: Դատական գործընթացին զուգահեռ ամեն ինչ արվելու է՝ անընդհատ հետաձգելու են, նոր շոու-ներկայացումներ են բեմադրելու, որպեսզի հանրությունը հոգնի, ուշադրությունը շեղվի այս կարևորագույն գործից: Իշխանության ղեկին գտնվողների ցանկությունը դա է, և ես չեմ կարող լուրջ վերաբերվել և քննարկել մի մարդու գործողություններ, ով իր խոսքում օգտագործում է «ատկատ» բառը, իսկ նախարարին էլ անվանական, ընկերական դիմում՝ այդ ամենով լեգիտիմացնելով համակարգի ֆինանսական մութ գործարքներով և քրեական բարքերով ղեկավարվելու դրույթները: Դա երկրում հաստատված խաղի կանոնների հերթական հստակեցումն է, հերթական ապտակը հասարակության երեսին, այլ ոչ իրավիճակը փոխելու կամարտահայտություն: Եվ իմ ասածը հաստատում է օրերս կատարված մի հերթական խայտառակ գործարք՝ կառավարության արտաքին գերատեսչության շենքի վաճառքը և այն զվարճանքի ու հանգստի վայր դարձնելու հեռանկարը: Համակարգի ողջ տրամաբանությունն է անգործության ու խրախճանքի տիրույթում՝ «Խրախճանք ժանտախտի ժամանակ»:
Այս ամենը կարող է հաղթահարվել միայն քաղաքացիական հասարակության պայքարի միջոցով՝ իրավական դաշտում, քանի որ ուժը մեկընդմիշտ իշխանության դաշտում է: Կարծում եմ՝ հիմա բոլորովին նոր գործիքներով պետք է աշխատել նրանց հետ, որ կարողանանք փոփոխության նոր իրավիճակ ստեղծել երկրում:
Զարուհի, արդյոք պայքարի նոր մեթոդներից կարելի է համարել «Ավետյան ցուցակ» ստեղծելու գաղափարը, որը կնախատեսի սանկցիաներ օրինազանց իշխանավորների նկատմամբ:
Դա ևս մի նոր ձև է պայքարի, որը նախաձեռնել է Վահե Ավետյանի քույրը՝ Նվարդ Ավետյանը: Հիմքում ընկած է 2012 թ. Հունիսին ԱՄՆ-ի Սենատի Արտաքին հարաբերությունների հանձնաժողովի կողմից կազմված «Մագնիտսկու ցուցակը», որը սահմանում է սանկցիաներ՝ տարբեր երկրներում մարդու իրավունքները խախտող պաշտոնյաների դեմ: Այդ ցուցակը դեռեւս կազմավորման փուլում է ու ներկայացվելու է հանրությանը, հավաքվելու են ստորագրություններ ու ներկայացվելու են ԱՄՆ-ի կառավարությանը, Մարդու իրավունքների միջազգային կազմակերպություններին, Եվրոպայի Անվտանգության ու Համագործակցության Կազմակերպությանը և այլ հեղինակավոր կառույցների՝ պահանջով, որ կիրառվի արգելանք Հայաստանի Հանրապետության այն պաշտոնյաների անձնական հաշիվների, մուտքի վիզաների նկատմամբ, ովքեր խախտում են մարդու իրավունքներն այս երկրում:
Սա ևս որոշակիորեն զսպման մեխանիզմ է երկրում անպատժելիության մթնոլորտի փոփոխության տեսանկյունից:

հունիսի 19-ին կատարված զննության հետեւանքով չեն պարզվել հանցագործության հետքերը դիտավորյալ ոչնչացելու հանգամանքներն ու պատճառները:

«Հարսնաքար»-ի գործով այսօրվա դատական նիստի ժամանակ նոր իրեղեն ապացույցներ ճանաչելու եւ աղմկահարույց դեպքի մանրամասները պարզելու վերաբերյալ Ավան եւ Նոր-Նորք համայնքների ընդհանուր իրավասության դատարանին 20 միջնորդությունների ամփոփ պահանջներ ներկայացրին տուժող կողմի փաստաբանները:

«Հարսնաքար» ռեստորանային համալիրում հունիսի 17-ին տեղի ունեցած ծեծից 12 օր անց մահացած ռազմական բժիշկ Վահե Ավետյանի իրավահաջորդի եւ այս գործով մյուս 4 տուժողների փաստաբան Տիգրան Եգորյանը նշեց, որ նախաքննական մարմինը չի դրսեւորել կամք՝ լրիվ, բազմակողմանի եւ օբյեկտիվ քննություն իրականացնելու համար:

Նախաքննության ընթացքում չպարզված մի շարք հանգամանքներ դատարանում պարզելու նպատակով փաստաբանի ներկայացրած 17 էջանոց միջնորդության մեջ վկայակոչվում են քրեական գործի առանձին նյութեր եւ ցուցմունքներ: Տուժող կողմի պնդմամբ, մասնավորապես, անհրաժեշտ է պարզել «Հարսնաքար» ռեստորանային համալիրում տեղի ունեցած դեպքի տեսաձայնագրության անհետացման հանգամանքները եւ դրանք վերականգնելու տարբերակները, այն, ինչ քննիչները չեն կատարել:

Տուժող կողմը նաեւ պնդեց, որ դեպքից երկու օր անց՝ հունիսի 19-ին կատարված զննության հետեւանքով չեն պարզվել հանցագործության հետքերը դիտավորյալ ոչնչացելու հանգամանքներն ու պատճառները:

Ըստ փաստաբանի, դեպքի վայրի զննության արձանագրությունը կազմվել է տուժողներից միայն մեկի՝ Էդգար Նիկոյանի մասնակցությամբ, ուստի, տուժող կողմը դատարանում պնդեց, որ բազմակողմանի, լրիվ եւ օբյեկտիվ քննություն ապահովելու նպատակով անհրաժեշտ է իրականացնել նոր տեղազննություն՝ բոլոր տուժողների եւ անհրաժեշտ վկաների մասնակցությամբ:

Տուժող կողմը վկայակոչեց այն ցուցմունքները, որոնք վկայում են, որ Ռուբեն Հայրապետյանը եւ այս գործով ամբաստանյալները նույն ժամին գտնվել են նույն տեղում. - «Ռուբեն Հայրապետյանի առնչությունն այս հանցագործությանը պետք է կասկածի տակ դրվեր հենց այս հանգամանքի բերումով, որ նույնիսկ իր անձնական թիկնազորի անդամ հանդիսացող Գարիկ Մարգարյանին Վահե Ավետյանին ծեծի ենթարկելու վերաբերյալ հրահանգ ունենալու եւ Ռուբեն Հայրապետյանի կողմից Վահե Ավետյանին ծեծի ենթարկելու պահին «Հարսնաքար» համալիրում գտնվելու վերաբերյալ հարցին Գարիկ Մարգարյանն ուղղակիորեն հրաժարվում է պատասխանել»:

Ի դեպ, այն պահին, երբ արդեն տուժող կողմի միջնորդության մեջ անդրադարձ կար Ռուբեն Հայրապետյանի եւ այս գործով ամբաստանյալների առնչությանը, ամբաստանյալների փաստաբանները, մեկը մյուսին հերթ չտալով, ընդդիմացան եւ պնդեցին, որ անթույլատրելի է, որ տուժող կողմը վկայակոչի քրեական գործի նյութերը, ցուցմունքները:

Տիգրան Եգորյանը հակադարձեց, որ սահմանափակված չէ որեւէ արտահայտություն հրապարակելիս: Պաշտպանական կողմը բազմիցս փորձեց առարկել եւ կանխել միջնորդության հրապարակումը: Ի վերջո պաշտպանական կողմը բացարկ հայտնեց դատավորին, որը, սակայն, մերժվեց:

Հաջորդ դատական նիստը նշանակված է հոկտեմբերի 17-ին:

Շարունակվում է «Հարսնաքար»–ի գործով դատավարությունը։ Փաստաբան Տիգրան Եգորյանը դատարանին ներկայացրեց 17 էջից բաղկացած 20 միջնորդություն։

Եգորյանը մասնավորապես նշեց, որ վկաներ Խաչատուր Սարգսյանը և Կառլեն Ստեփանյանը հայտնել են, որ «Հարսնաքար»–ի տարածքում եղել են տեսախցիկներ, և որ «անհրաժեշտ է կատարել համակարգչի պրոցեսորի հետազոտություն»։

Փաստաբանը միջնորդեց հետաքննության ենթարկել Վահե Ավետյանի վիրահատության մանրամասները և փորձաքննություն նշանակել՝ կապված գանգոսկրի և մաշկի համապատասխան հատվածների հետ, նաև զննել «Հարսնաքար»–ի տարածքը։

Ըստ փաստաբանի՝ պետք է տուժողների հագուստը ճանաչել որպես իրեղեն ապացույց և հետազոտություն անցկանցել։ Եգորյանն արձանագրեց նաև, որ Հարսնաքարի» տարածքից անհայտ հանգամանքներում անհետացել են հետքերը։

Տիգրան Եգորյանը դեռ չէր վերջացրել ներկայացնել միջնորդությունը, երբ ամբաստանյալների պաշտպաններն առարկություններ ներկայացրին։ Նրանք դիմեցին դատարանին, պահանջելով, որ Տիգրան Եգորյանն առանձին–առանձին ներկայացնի միջնորդությունները, որպեսզի կարողանան անդրադառնալ դրանց։ Պաշտպաններն առարկում էին, որ միջնորդություններում փաստաբան Եգորյանը զերծ մնա այն բառերից, որոնք քրեական գործում չկան. նրանց խոսքերով՝ միջնորդությունները պարունակում են ապացույցներ, հրապարակումներ։

Փաստաբան Եգորյանը նաև նշեց, որ իրենք պատրաստ են միջնորդությունների օրինակները տրամադրել պաշտպաններին։

Դատախազն իր հերթին առաջարկեց վերախմբագրել ներկայացված միջնորդությունները, լիարժեք համապատասխանեցնել քր. օրենսգրքին։ Նրա խոսքերով՝ միջնորդություններն ամբողջական տեքստով ներկայացնելը խնդիր չի առաջացնում և ժամանակի առումով ավելի նպատակահարմար է։

Փաստաբան Եգորյանը, պատասխանելով առարկություններին և դատախազի միջնորդությանը, նշեց, որ միջնորդությունները ներկայացվել են մեկ փաթեթով, որ գործը չձգձգվի, բայց եթե անհրաժեշտություն կա, նրանք պատրաստ են միջնորդությունները ներկայացնել առանձին–առանձին։

Ինչ վերաբերում է միջնորդությունների վերախմբագրմանը, փաստաբանն ասաց, որ դա միջնորդություններին կհաղորդի պատրանքային բնույթ։

Դատավոր Հարությունյանը թույլ տվեց Տիգրան Եգորյանին շարունակել ներկայացնել միջնորդություններն իրենց իսկ նախընտրած ձևաչափով։

Դատական նիստը շարունակվում է։ Տիգրան Եգորյանը շարունակում է ներկայացնել միջնորդությունները։

Հիշեցնենք, որ դատավարությունը նշանակվել է հուլիսի 17-ին նախկին ՀՀԿ պատգամավոր Ռուբեն Հայրապետյանին պատկանող «Հարսնաքար» համալիրում Հայրապետյանի թիկնազորի կողմից խոշտանգումների ենթարկված և հուլիսի 29-ի մահացած ռազմական բժիշկ Վահե Ավետյանի սպանության գործով։

Սա ավելի շուտ դաս է բոլոր մնացած այն լկտիներին, որոնք կփորձեն այսուհետև նման վարք դրսևորել

«Վահե Ավետյան» հասարակական շարժման անդամ Գարեգին Չուգասզյանը հայցադիմում է ներկայացրել Ավան և Նոր Նորք վարչական շրջանների ընդհանուր իրավասության դատարան` բարի համբավին, պատվին, արժանապատվությանը և գործարար համբավին պատճառված վնասի հատուցման պահանջի մասին:
«Ռուբեն Հայրապետյանը հրապարակային վիրավորանքի և զրպարտության միջոցով արատավորել է իմ պատիվն ու արժանապատվությունը՝ խախտելով իմ անձնական կյանքի նկատմամբ հարգանքի իրավունքը», մասնավորապես իր խախտված իրավունքը արձանագրել է դիմումի հեղինակը:
Նա դատարանից խնդրում է պարտավորեցնել այդ ժամանակ պատգամավոր, ֆուտբոլի ֆեդերացիայի նախագահ Ռուբեն Հայրապետյանին հրապարակայնորեն ներողություն խնդրել իր հասցեին հնչեցրած վիրավորական արտահայտությունների համար և հերքել իր բարի համբավը, պատիվը, արժանապատվությունը և գործարար համբավն արատավորող տեղեկությունները:
Դատարան նույնաբովանդակ հայցադիմումներ են ներկայացրել նաև «Վահե Ավետյան» հասարակական շարժման անդամ, ազգագրագետ Հրանուշ Խառատյանը և «Պահանջում ենք պատժել «Հարսնաքարում» տեղի ունեցածի բոլոր մեղավորներին» հասարակական շարժման անդամ Դավիթ Սանասարյանը:
Հունիսի 17-ին Ռուբեն Հայրապետյանին պատկանող «Հարսնաքար» ռեստորանային համալիրում վերջինիս անձնական թիկնազորը ծեծի էր ենթարկել մի խումբ զինվորական բժիշկների, որոնցից մեկը` Վահե Ավետյանը, այդպես էլ գիտակցության չգալով` հունիսի 29-ին մահացել էր:
«Վահե Ավետյան» հասարակական շարժումը պահանջում է զինվորական բժիշկ Վահե Ավետյանի սպանության բոլոր մեղավորների բացահայտում և տուժողի կյանքի իրավունքի խախտման փաստի արդյունավետ քննության իրականացում և այդ կապակցությամբ շարունակական բողոքի ակցիաներ է անցկացնում:
Գարեգին Չուգասզյանի հայցադիմումում տեղ են գտել Ռուբեն Հայրապետյանի կողմից «Նուվել դ’Արմենի Մագազին» ամսագրին օգոստոսի 11-ին տված հարցազրույցում իր հասցեին հնչեցրած «անվայելուչ վիրավորանքներ և զրպարտող, իրականությանը չհամապատասխանող արտահայտություններ և սպառնալիքներ»:
Հոդվածը լայն արձագանք է ստացել հայկական մամուլում և հասարակության մեջ, և այն մասամբ կամ ամբողջությամբ վերահրապարակվել է գրեթե բոլոր տպագիր և էլեկտրոնային լրատվության միջոցներով:
«Գարեգին Չուգասզյանն ո՞վ է. Ռոբերտ Քոչարյանի «շնիկը», «ոհմակ են», «վարձու մարդիկ», «Մինչև մահ վախենալու են ինձանից», «Իրենց ընտանիքներն իմ ձեռքը կրակն են ընկնելու», «Իրենք բոլորը շաքարով հիվանդանալու են», «դուք կտեսնեք, թե այդ Գարեգինն ինչպես է ամեն օր գալու ձեռքս համբուրելու ու գնա»:
«Դեպքից հետո քառասունհինգ օր է անցել, կարծում եք՝ ես այնպիսի մեկն եմ, ով չգիտե՞, թե ով ումից է պատվեր ստանում..Նրանք ի՞նչ պիտի անեն: Պիտի թուլացնեն, խայտառակեն, վարկաբեկեն Սերժ Սարգսյանի հավատարիմ մարդկանց, որպեսզի Բարգավաճ Հայաստանը Ռոբերտ Քոչարյանի հետ գա իշխանության: Ո՞վ է դրանց ֆինանսավորում, ո՞վ է պատվեր տալիս, ուղարկում իմ տան վրա», «Ո՞վ է ավտոբուսներով բերում, տանս դիմաց դատարկում», «Ո՞վ չի հասկանում... Գարեգին Չուգասզյանը, անմիջապես դեմքները բացեցին... իսկ մնացած լակոտ-լուկուտները ո՞վ են... ես գիտեմ, թե ինչքան փող են առնում, գալիս են: Անգիր գիտեմ՝ ով է տանում փողերը տալիս, ինչ են անում : Եվ ո՞վ է ֆինանսավորում նրանց. Դոդի Գագոն: Այ այդպես»:
Հիմնավորելով իր պահանջը դիմումատուն վկայակոչել է ՀՀ Սահմանադրությամբ արձանագրված մի շարք հոդվածներ, որոնք ամրագրում են մարդու, նրա արժանապատվությունը, հիմնական իրավունքներն ու ազատությունները որպես բարձրագույն արժեքներ: ՀՀ Սահմանադրությունը, երաշխավորելով մարդու անձնական կյանքի անձեռնմխելիության և արժանապատվության իրավունքը, արգելում է բոլոր տիպի ոտնձգություններն անձի պատվի և արժանապատվության նկատմամբ:
Մարդու այս իրավունքները վավերացված են նաև միջազհային պայմանագրերով, որոնք Հայաստանի Հանրապետության իրավական համակարգի բաղկացուցիչ մասն են: Եթե վավերացված միջազգային պայմանագրում սահմանվում են այլ նորմեր, քան նախատեսված են օրենքներով, ապա կիրառվում են այդ նորմերը:
Մարդու իրավունքների եվրոպական դատարանն իր մի շարք վճիռներում արտահայտել է ան դիրքորոշումը, որ անձի բարի համբավի պաշտպանության իրավունքը ներառված է 8-րդ հոդվածում որպես անձնական կյանքի նկատմամբ հարգանքի իրավունքի բաղադրիչ:
ՀՀ քաղաքացիական օրենսգիրքն իր հերթին սահմանում է. «Անձի պատիվը, արժանապատվությունը, գործարար համբավը ենթակա են պաշտպանության այլ անձի կողմից հրապարակայնորեն արտահայտված վիրավորանքից և զրպարտությունից»: Մասնավորապես նույն օրենսգրքի 1087.1-րդ հոդվածը, կարգավորելով մարդու պատվին, արժանապատվությանը և գործարար համբավին պատճառված վնասի հատուցման կարգը և պայմանները. «Անձը, որի պատիվը, արժանապատվությունը կամ գործարար համբավը արատավորել են վիրավորանքի կամ զրպարտության միջոցով, կարող է դիմել դատարան՝ վիրավորանք հասցրած կամ զրպարտություն կատարած անձի դեմ», նաև հստակորեն տվել է «զրպարտության» և «Վիրավորանքի» սահմանումները:
«Դատարան դիմելու իմ այս քայլն ավելի շատ ուղղված է հանրությանը, քան Ռուբեն Հայրապետյանին: Ես ակնկալիքներ չունեմ, որ այդ մարդն իր այս տարիքում կփոխվի: Նրա մեղա գալու`կոկորդիլոսի արցունքները մենք բազմիցս տեսել ենք, դրա համար հատուկ վստահություն չի կարելի ունենալ նրա ներողության հետ,-ասում է Գարեգին Չուգասզյանը,- Սա ավելի շուտ դաս է բոլոր մնացած այն լկտիներին, որոնք կփորձեն այսուհետև նման վարք դրսևորել»:

Լուրջ բանը կլինի այն ժամանակ, երբ որ տեսնենք, որ գործն ամբողջությամբ կոծկվում է

Այն, որ Ռուբեն Հայրապետյանն այլեւս պատգամավոր չէ, բավարար պայման չէ` «Պահանջում ենք պատժել Հարսնաքարի մեղավորներին» քաղաքացիական նախաձեռնության անդամների համար` դադարեցնելու իրենց պայքարը:
«Հայրապետյանի` ԱԺ պատգամավորությունից հրաժարվելը մեր պահանջներից մեկն է, ոչ շատ կարեւոր պահանջներից մեկը: Հրաժարվելով պատգամավորությունից՝ նա փաստացի ընդունեց իր մեղավորությունը հունիսի 17-ին կատարվածի մեջ: Բայց իր մեղքը լիովին ընդունած կհամարենք, երբ դատարանում կընդունի իր մեղքը», - «Ա1+»-ի նետ զրույցում ասաց շարժման համանախաձեռնող Դավիթ Սանասարյանը:
Նա վստահ է որ Ռուբեն Հայրապետյանը մանդատից չէր հրաժարվի, եթե «Հարսնաքարի» սպանության գործը հասարակական բողոքի ալիք չբարձրացներ:
«Ինչպես Մաշտոցի պուրակում, այնպես էլ այս դեպքում եւ մնացած գալիք բոլոր դեպքերում եթե չլինի հասարակական ճնշում, որեւէ արդյունք պետք չէ ակնկալել: Դրա համար ես ավելի շատ կարեւորում են այն գիտակցության արթնացումը մեր հայրենակիցների մեջ, որ, կապված կլինի բնապահպանական խնդիրների, մարդու իրավունքների թե ազգային հարցերի հետ, եթե կա հասարակական ճնշում, միանշանակ արդյունք լինելու է», - ասաց նա:
Սանասարյանը հույս ունի, որ «Հարսնաքարի» գործով իշխանությունները դեռեւս շանս ունեն` նոր հունի մեջ դնելու դատաքննությունը, որին ներգրավված կլինի նաեւ Ռուբեն Հայրապետյանը: Հակառակ պարագայում նա բողոքի նոր, ավելի հզոր ալիք է խոստանում, քան եղել է այս ամռանը:
«Մենք պարբերաբար հավաքվում ենք, քննարկում ենք մարտավարական հարցեր` թե որ քայլը որ պահին ճիշտ կլինի: Մեծ հաշվով դեռ մինչեւ օրս ոչ մի լուրջ բան չի եղել: Լուրջ բանը կլինի այն ժամանակ, երբ որ տեսնենք, որ գործն ամբողջությամբ կոծկվում է», -եզրափակեց Դավիթ Սանասարյանը:
Հիշեցնենք, որ հունիսի 17-ին ԱԺ ՀՀԿ խմբակցության արդեն նախկին պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանի աշխատակիցները դաժան ծեծի էին ենթարկել ռեստորանի երեք հաճախորդների: Ծեծի արդյունքում դեպքից 12 օր անց հիվանդանոցում մահացավ երեսուներեք ամյա ռազմական բժիշկ Վահե Ավետյանը:

Հրապարակախոս, քաղաքացիական ակտիվիստ Զարուհի Հովհաննիսյանն այսօր ակցիա է իրականացրել Հայաստանի ֆուտբոլի ֆեդերացիայի շենքի առաջ: Ակցիան ուղղված է եղել ֆեդերացիայի նախագահ Ռուբեն Հայրապետյանին, որին պատկանող Հարսնաքար ռեստորանային համալիրում սպանվեց ռազմական բժիշկ Վահե Ավետյանը:
Զարուհի Հովհաննիսյանը ջութակ է նվագել ֆեդերացիայի դիմաց: Բանն այն է, որ Ռուբեն Հայրապետյանն իր նախկին ասուլիներից մեկում խոսելով ինչ որ բանի մասին, հայտարարել էր, թե եթե ինքը ծեծում է, պատժում, պետք չէ զարմանալ, զարմանալ պետք է, երբ ինքը ջութակ է նվագում:
Զարուհի Հովհաննիսյանի ակցիայի մասին պատմող տեսանյութը պատմում է նաեւ Հարսնաքարի բռնության մասին:

«Հարսնաքարի» գործով դատավարությունն առաջիկա օրերին կարող է կանգ առնել, և հնարավոր է' նյութերը վերադարձվեն նախաքննության փուլ: Նման կանխատեսման համար լուրջ հիմքեր ունեն տուժողների փաստաբանները: Վահե Ավետյանի իրավահաջորդի ներկայացուցիչ, փաստաբան Տ. Եգորյանը երեկ «Հայկական ժամանակ»-ի թղթակցին հայտնել է, որ հոկտեմբերի 1-ին փաստաբանները դիմել են Կենտրոն և Նորք-Մարաշ վարչական շրջանների ընդհանուր իրավասության դատարան, պահանջելով ստուգել դատախազության կողմից փաստաբանների բազմաթիվ միջնորդությունները մերժելու օրինականությունը և վերացնել մերժման որոշումը: Դատարանը այդ դիմումը պետք է քննարկի' հանձնելուց հետո տասնօրյա ժամկետում:

«Սա կարող է շատ հետաքրքիր զարգացման վերածվել, որովհետև դատախազի որոշումը վերացնելով' մենք կանգնելու ենք այս դատական նիստը շարունակելու անհնարինության առաջ, չէ՞ որ այդ որոշմամբ էր գործով մեղադրական եզրակացությունը հաստատվել և ուղարկվել դատարան»,- թերթի թղթակցի հետ զրույցում նշել է Տիգրան Եգորյանը և ավելացրել, որ Կենտրոն և Նորք-Մարաշ վարչական շրջանների ընդհանուր իրավասության դատարանին ներկայացրած իրենց փաստերը շատ ամուր են, և դատարանին դժվար կլինի դրանք անտեսել:

նիստը դարձյալ հետաձգվեց

«Հարսնաքարի» գործով Ավան և Նոր Նորք վարչական շրջանների ընդհանուր իրավասության դատարանում հոկտեմբերի 3-ին նշանակված դատական նիստը դարձյալ հետաձգվեց, այս անգամ մինչև հոկտեմբերի 10-ը:

Դատարան էին բերվել ամբաստանյալներ Գարիկ Մարգարյանը, Արթուր Բաբլոյանը, Արման Բաղդասարյանը, Նորայր Հայրապետյանը, Դավիթ Ադամյանը, Արման Խաչատրյանը: Արման Բաղդասարյանի պաշտպանությունը ստանձնած Հովհաննես Հարությունյանի փոխարեն դատարան էր ներկայացել ՀՀ փաստաբանների պալատի անդամ Վաղարշակ Գևորգյանը: Դատավոր Դավիթ Հարությունյանը տեղեկացրեց, որ սեպտեմբերի 29-ին դատարանը ստացել է ամբաստանյալ Արման Բաղդասարյանի դիմումը, որով վերջինս հրաժարվել է Հովհաննես Հարությունյանից՝ լուծարելով նրա հետ իր պայմանագիրը:

Մեղադրյալ Արման Բաղդասարյանի նորանշանակ փաստաբան Վաղարշակ Գևորգյանը դատարանից պահանջեց իրեն 2 շաբաթ տրամադրել նյութերին ծանոթանալու համար, սակայն դատարանը գործի նյութերին ծանոթանալու համար 7 օրը բավարար համարեց:

Դատական նիստին չէին մասնակցում տուժողներ Արտակ Բայաթյանը, Գարիկ Սողոմոնյանը, Արկադի Աղաջանյանը, Էդգար Նիկոյանը, տուժողի իրավահաջորդ Գառնիկ Ավետյանը և նրա ներկայացուցիչ Վահե Գրիգորյանը: Հերթական դատական նիստը նշանակվեց հոկտեմբերի 10-ին, ևս մեկ նիստ էլ՝ հոկտեմբերի 22-ին:

Հիշեցնենք, որ հունիսի 17-ին, ժամը 23-ի սահմաններում ԱԺ հանրապետական պատգամավոր, ՀՖՖ նախագահ Ռուբեն Հայրապետյանին պատկանող «Հարսնաքար» ռեստորանային համալիրում դաժան ծեծի էին ենթարկվել 3 ռազմական բժիշկներ: Նրանցից մեկը` ՊՆ կենտրոնական կայազորի ռազմական հոսպիտալի ԼՈՌ բաժանմունքի պետ, բուժծառայության մայոր Վահե Ավետյանը, հունիսի 29-ին հիվանդանոցում մահացել էր:

«Հարսնաքարի» գործով կալանավորվածները 6-ն են՝ համալիրի անվտանգության աշխատակիցներ Արթուր Բաբլոյանը, Գարիկ Մարգարյանը, Արման Խաչատրյանը, Արման Բաղդասարյանը, մատուցող Դավիթ Ադամյանը և Նորայր Հայրապետյանը: Նրանք բոլորը մեղադրվում են տուժողների առողջությանը դիտավորությամբ ծանր վնաս պատճառելու մեջ:

Լուսանկարը՝ PanARMENIAN Photo-ի